The King’s Speech قصة ونقد تحليى لفيلم

The King’s Speech قصة ونقد تحليى لفيلم

- ‎فيفن وسينما
2٬254 views

The King’s Speech | 2010

ده مشهد خطاب الحرب العالمية التانية للنجم الإنجليزي “كولين فيرث”، واللي جسّد فيه شخصية الملك “جورج السادس”. خط القصة الأساسي في الفيلم ده هو معاناة الملك “جورج” مع لعثمة الكلام وصعوبة النطق، وعلاقة الصداقة بمدربه د. “ليونيل لوج”، واللي بيساعده وبيدرّبه على إلقاء الخطابات والتغلب على صعوبات النطق.

أداء “فيرث” في المشهد ده كان أكتر من رائع، وقدر بالفعل من خلال تعبيرات وشّه المتوترة، ونظراته وطريقة كلامه إنه ينقل لنا كمشاهدين لحظات الرهبة والخوف قبل ما يبدأ الخطاب. الناس اللي شافت الفيلم ممكن يفتكروا مدى التوتّر اللي حسّوا بيه، وهم في إنتظار لحظة بداية الخطاب. سحر المشهد في إن الخطاب ده كان أبعد ما يكون عن القوة الخطابية أو الطلاقة الكاملة. على العكس، هتلاحظوا إن الملك كان بيركّب الجمل والكلمات بصعوبة شديدة وبمجهود خرافي، ومع ذلك أضاف واقعية كبيرة للمشهد، وساب تأثير كبير على كل اللي بيسمعوا الخطاب.

مخرج الفيلم “توم هوبر” كان ذكي في استخدامه للمونتاج، والتقطيع بين لقطات الملك وهو بيتكلم مع لقطات ردود الأفعال للناس اللي بتسمعه وحركة الكاميرا البطيئة اللي هتشوفوها في لقطات كتيرة على وشوش المستمعين. إختيار الموسيقى كان موفّق جداً، وهي بالمناسبة جزء من السيمفونية السابعة لبيتهوفن، لأنها قدرت تسيب مشاعر متداخلة ومختلفة عند المشاهد زي حالة النجاح اللي بيمر بيها الملك وهو بيكافح عشان يتغلّب على اللعثمة، وكمان ترقّب وخوف الملايين من قرار مشاركة بريطانيا في الحرب.

من أجمل الحاجات الموجودة في المشهد في الدقيقة 6.43 هي اللحظة اللي الدكتور فيها وقّف توجيهه وإشاراته للملك، وبدأ الخطاب يأثر فيه بالفعل كمستمع عادي. الفيلم ده أخد أربع جوايز أوسكار من ضمنها أفضل فيلم لسنة 2011، وطبعاً جايزة أفضل ممثل ل “كولين فيرث”. تقدروا تشوفوا المشهد كامل على لينك يوتيوب دي

https://youtu.be/PPLIw64rLJc

Facebook Comments

25 Comments

  1. اولا انا مبسوط فشخ انكوا رجعتوا
    ثانيا انا معاكوا معظم الوقت سابق بخطوة ومافيش حاجة بتتكلموا عنها الا لما بكون شفتها قريب

  2. متغبوش تاني كدا مبتفرجش غير ع الافلام اللي بتتكلموا عنها 😭

  3. فينكم من بدرى …. حمدلله ع السلامه 😊

  4. بس متهيالى الفيلم كان حقبه زمنيه قبل الحرب العالميه التانيه بكتير ياحج

  5. حمد الله ع السلامة

  6. حمد على السلامة ايه الغيبة دى

  7. جيوفيري راش تلاتين مرة ياخوانا والله
    اداؤه كانه مايسترو بيقود أوركسترا
    ولما قاله لسه عندك صعوبة ف نطق كذا وكذا
    راح الملك قاله كان لازم اعمل كده عشان الناس تعرف انه انا

  8. ايوة قبل ما يبدا الخطاب انا كنت رايحة جاية اللي هو قلقانة بجد وما ارتحتش الا لما مشي فيه ولما الدكتور ارتاح كمان من احلي الافلام اللي شفتها واحب اشوفها تاني وتالت ♥♥

  9. الفيلم العظيم جداً ❤️💙
    افتكر قاله ف وسط الفيلم حاجه بمعنى ” البطئ ف الكلام بيدي الكلام وقار ”
    ورد وقاله ” اذن انا اكتر شخص وقور 😂 “

  10. الفيلم ده نزلته وسمعت ان الممثل ده فعلا كان عنده مشكله او عمل عنمليه فى الحنجره او الاحبال الصوتيه وكان ممتاز لانه اتقن الدور الىل كان محتاج منه كده تقريبا خد جايزه

  11. الفيلم ده مش طبيعي بجد لما باشوفه بانبهر بمستوى التمثيل اللي فيه

  12. بجد مشهد روعة وتحليلك رائع ودا من اكتر المشاهد المؤثرة اللي شفتها لانه الخطاب دخلك في حياة الاشخاص اللي بيسمعو الخطاب فانت مستني القرار الحاسم زي الشعب الانجليزي

  13. والاصعب ان اخوه كان بينازعوا على الحكم وكان اكثر من مرة هيتنازل عن العرش فعلا وسبق ونهر المدرب بتاعه كتير وكاد ان يفقده

  14. والله كنت متعاطف مع الملك ده طول الفيلم علشان يتكلم كلمتين ع بعض

  15. ريمونتادا behind the scenes💕

  16. كان فيلم جميل و كولين فيرث استحق الاوسكار بجداره

  17. فيلم رائع و المشهد ده تحديدا كان الاروع

  18. فيلم عبقري.. شفتة في 2011 ولسة معلم معايا.

‎إضافة تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

You may also like

روجينا فى حلقه ابله فهيتا

استضافت ابله فاهيتا بالامس  روجينا  فى  حلقات برنامجها