Birdman | 2014 قصه فيلم

Birdman | 2014 قصه فيلم

- ‎فيفن وسينما
0

Birdman | 2014

من وقت الميلاد لحد لحظة الموت، حياتنا ما هي إلا مشهد سينمائي طويل من غير “مونتاج”. بنفتح عيوننا الصبح… بنتحرّك وناخد قرارات صح أو غلط… ونستكّشف هدف حياتنا بطرق مختلفة. كل الأوقات الحلوة والصعبة متصوّرة وكأنها لقطة طويلة بكاميرات مختلفة، وبدون أي فرصة للرجوع لورا. الوقت الوحيد اللي فيه “مونتاج” هي اللحظة اللي بنقف فيها مع نفسنا، ونتكلم عن حياتنا، وعن المعنى اللي وراها.

دي كانت كلمات “آليخاندرو إناريتو” مخرج الفيلم لمّا وصف تجربة “بيردمان”، ورغبته إن المشاهد يدخل “حياة البطل”، على مستوى الفيلم والرمز، ويعيش جواها بدون أي فرصة للخروج. عشان كده، “إناريتو” صمّم الفيلم ببراعة، وكأنه لقطة واحدة مستمرة من غير تقطيع، واللي تطلّب دقة تقنية غير طبيعية من عبقري السينماتوجرافي “إيمانويل لوبيسكي”، وإعداد مسبق لكل حركة، وكل لمحة، وكل كلمة إتقالت في الفيلم.

ده مشهد الطيران الشهير للمبدع “مايكل كيتون”، واللي بتتصارع جواه ذكريات “السوبر هيرو” وأوهام القدرات الخارقة مع رغبته إنه يرجع لعالم الشهرة بإنه يعمل مسرحية “برودواية” مختلفة، يحس من خلالها إنه حقق ذاته قبل لحظة الانتحار. المشهد بيبدأ ببطل الفيلم – النجم اللي راحت عليه بتعبيرنا الدارج – وهو واقف فوق سطح مبنى إستعداداً إنه يرمي نفسه. لاحظوا اللمحة الساخرة، وهو بيقول كلمة “موسيقى” عشان يحط بنفسه الموسيقى التصويرية للحظة اللي ناوي يعيشها. بالرغم من محاولة حد إنه يساعده، إلا إنه بيقرر إنه ينط من فوق المبنى بشكل مفاجئ، وبدل ما يقع، بيبدأ يطير فوق الناس والعربيات في حالة من التسامي مع الجملة الشهيرة… إن مكانه هنا… فوق الناس كلها.

المشهد بيعكس الصراع النفسي اللي بيمر بيه بطل الفيلم، ومعاناته المستمرة مع “النقد الذاتي” و “معنى النجاح” عشان يكون مختلف عن الأخرين، وفي نفس الوقت بيعبّر عن الرغبة الهستيرية إنه يرجع لأضواء الشهرة مرة تانية. لاحظوا في الدقيقة التانية دخول البطل في ضلمة النفق واللون الأسود – وكأنها رحلة سريعة لإكتشاف الذات – وبعدها مباشرة الصعود المفاجئ في إتجاه الشمس، وإنعكاس الضوء لثواني من النور الأبيض الساطع على الشاشة. إختيار الموسيقى الكلاسيك المصاحبة للطيران كان أكتر من رائع. الموسيقى هي جزء من السيمفونية التانية للموسيقار الروسي “رخمانينوف”، واللي إشتهر هو كمان بالنقد الذاتي المرضي لكل أعماله، وعدم رضاه عن أي نجاح حققه في حياته.

المشهد بياخدنا معاه في لحظات الهبوط التدريجي للسوبر هيرو في إتجاه الأرض، وطلبه إن الموسيقى تقف، وبينتهي بجملة سوّاق التاكسي وهو بيجري ورا “البطل الموهوم” عشان ياخد الأجرة، واللي المشاهد هيفهم من خلالها إنه كان عايش بالفعل مع أوهام وضلالات بطل الفيلم. الطريف إن لحظة الانتحار إتكررت أكتر من مرة للفيلم عشان تخضع للتفسير الذاتي للمشاهد. “إناريتو” نفسه وصف الفيلم كنوع مختلف من الفن، واللي كل مشاهد هيفسّر النهاية والعبرة زي ما هو عايز. تقدروا تشوفوا المشهد على لينك يوتيوب دي

https://youtu.be/cX3VbKEooWQ

Facebook Comments

20 Comments

  1. انا باحبَك /باحبِك / باحبكم.😍😍😂✌
    حسب الادمن/ز الفشيخ اللي في الصفحة دي 😍
    اول ناس بتحلل الافلام بطريقة تكيف.. بتحسسوني اني مش لوحدي
    Keep it Up 👍👍😍😍

  2. من أفضل الأفلام اللي اتعملت في آخر 10 سنين..
    وبالنسبالي أفضل سينماتوجرافي شوفته.. العبقري لوبيسكي واللونج شوتس الخيالية اللي عمري ماحسيت بأي ملل وأنا بتفرج عليها..
    بالنسبالي أكتر حاجة ميّزت الفيلم دا عن كل افلام 2014 هي الموسيقي.. باستثناء بعض مقطوعات قصيرة لرحمانينوف وتشايكوڤيسكي فموسيقي الفيلم كلها كانت عبارة عن درامز فقط للرائع أنتونيو سانشيز..
    كل دا تحت قيادة أليخاندرو إيناريتو اللي المفروض نشكر اللي اداله الجرين كارد! :’D

  3. أنا لسه منزل الفيلم عشان أتفرج عليه بكرة فى الاجازة بعد فترة طويلة من التأجيل !

  4. كانت اول تجربة فيلم rope للعظيم hitchcock و اليخاندرو طلع قال فكرة ال long take بالمنظر ده كانت تطلب تكنولوجية الزمن ده…انا شوفته 4 مرات للناس اللي بتقول ممل

  5. دى قصة مايكل كيتون نفسه بعد فيلم باتمان ما قضى على مسيرته المهنية تقريبا و دة كان الcareer revival بتاعه .. وبالفعل فيلم Bird Man خلى مايكل كيتون يظهر من جديد و يشتغل أفلام من تانى .. كان يستحق الأوسكار اكتر من Danish Girl لكن للأسف هوليوود بتحب أفلام الشواذ جنسيا

  6. يا جدعان صدقونى انا لما باجى البيدج دى بحس انى قاعد فى وسط عيلتى اللى شبهى و اهتمامتهم و الحاجات اللى بيحبوها نفس اهتماماتى و اللى حاجات اللى بحبها ^-^

  7. دة فيلم بن ملل وماسخ وبايخ وحرام الساعتين اللى واحد أتفرج عليه فيهم بس ف الآخر دى آراء بصوت هنيدى

  8. الفيلم ده من نوعية اللي تحطها للمشاهده علشان تعرف نوعية الافلام اللي بيفضلها
    وهل بيشاهد الافلام لايه وايه اللي بيحبه في الافلام ✋

  9. من أروع الافلام الي تصويرها مازال تحفة فنية .. اكتر من مشهد بيتعمل لمدة تزيد عن 20 دقيقة بنفس الكاميرا .. ممثلين عايشين الدور بمعني الكلمة .. إدوارد نورتن كان دوره متميز … ابداااع

  10. كفيت ووفيت الحقيقه ..
    من افضل الافلام اللي شوفتهاا
    ومش فاهمه الناس اللي بتقول عليه ممل داا شايفينه ازاي !

  11. اختلف معاك في النهايه 😀 هو انتحر فعلا لأنه حقق اللي هو عايزه خلاص و الدليل اسمع كويس اوي ساعت لما ايما ستون بصت تحت و فيه صوت اسعاف خفيف ظهر بعدها بصت لفوق

  12. فيلم جيد ولكن ينقصه الكثير كما ان اختيار بعض الأدوار كان خاطئ
    اليخاندرو ايناريتو طور من نفسه في فيلم The Revenant وعمل اجمل افلامه

  13. فيلم تافهه و لا يستحق المشاهدة من نوعية افلام الضجة وفقط

  14. اخيرا لقيت صفحة تتكلم عن الفيلم ده … الفيلم عبقرى وفعلا نوع مختلف

  15. This is brilliant
    Am a big fan walahy ya ged3an ❤

  16. ليه مش بتعملوا التفسير في فديوهات كدا هتبقي ممتعة اكتر 😃 بس دا مش يمنع انكم صفحة ناجحة ❤

  17. الفيلم ده عبقرى احلي فيلم شفته اتعمل من فتره كبيره

  18. فيلم فوق الرائع
    عبقري علي كل المستويات

  19. واخد اوسكار ده حلي بالك

  20. مش عارف ليه مش بطيق الفيلم دا

‎إضافة تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

You may also like

قصة ونهايه فيلم Whiplash 2015

Whiplash | 2015 مشهد النهاية من فيلم ويبلاش