Forrest Gump | 1994r قصة فيلم

Forrest Gump | 1994r قصة فيلم

- ‎فيفن وسينما
0

Forrest Gump | 1994

البداية الرائعة ل “فورست جامب”، واللي كان بطلها “الريشة البيضا” في رحلتها من السما للأرض، قبل ما قصة “جامب” تبدأ على الأرض نفسها.

في الجزء الأول من المشهد، الكاميرا بتطير ورا الريشة في لقطات متوسطة، وفي الخلفية هتلاحظوا الغيوم في السما، وتباين اللون مع اللون الأبيض للريشة. بعد كده بتظهر تفاصيل المدينة بشكل تدريجي سواء المباني أو الشجر الأخضر، مع الحفاظ على تباين اللون عشان عين المشاهد تفضل مركّزة على “بطلة المشهد”. حركة الريشة فيها مزيج من النعومة والمرونة لأنها بتدور في كل الإتجاهات بطريقة تخليّنا مش عارفين الرحلة هنتنهي إزاي وفين. ذكاء المخرج “روبرت زيمكيس” إنه ضمن تركيز المشاهد وفضوله من الثواني الأولى في الفيلم عشان يعرف مصير الريشة، ورسم “موود” الفيلم، وكمان خلق توقّع مبكّر إننا هنتفرج على رحلة سينمائية مختلفة.

في الدقيقة 1.22، هتلاحظوا إن بطل الفيلم “فورست” بيظهر على الشاشة في لقطة واسعة من فوق وهو قاعد بعيد على البنش، وبعدها مباشرة بيظهر أربع أشخاص في الكادر بشكل عشوائي. الريشة مانزلتش على واحد من الأشخاص القريّبين اللي في “وسط الكادر” لكنها بالصدفة بتكمّل رحلتها، وتنزل على الشخص اللي شفناه بسرعة في البداية “على الهامش”. لاحظوا إنها في الأول كانت هتنزل على كتف الراجل اللي لابس “بدلة”، ومع تحركه المفاجئ، غيّرت إتجاهها، ونزلت أخيراً على الحذاء الرياضي “المبهدل” اللي لابسه “فورست جمب”.

المخرج إختار إنه يصمّم معظم اللقطات من غير أصوات أصلية، ويضيف بس الموسيقى التصويرية المذهلة اللي هتسمعوها في المشهد، واللي كتبها للفيلم “الان سيلفستري”. المشاهد هيلاحظ إن الموسيقى نفسها كأنها بتعكس رحلة الريشة من خلال تكرار التيمة الأساسية على البيانو والوتريات، وإنها بتعلى بشكل تدريجي لمّا الريشة بتقرّب من الأرض، وبتبعد وتختفي على مراحل مع ظهور بطل الفيلم في الجزء الأخير من المشهد.

مش قادر أحدد الريشة بترمز لإيه. هل المخرج لخّص قصة الفيلم كله في دقيقتين وخلّى الريشة هي الرمز لبطل الفيلم المختلف بشكل رائع عن الأخرين، واللي الدنيا “شقلبته” حرفياً في كل الإتجاهات لكنه قرر إنه “يجري معاها وضدها” لغاية ما يوّصل لمرحلة الاستقرار الحزين لأول مرة في حياته. هل الريشة هي رمز لفكرة “المصير”، وإن إحنا كبشر مضطرين إننا نتقبّل حياتنا زي ما هي بغض النظر عن كوننا مختلفين. هل “فورست جامب” في اللحظة اللي مسك فيها الريشة وبعدين حطها في “كتاب الأطفال” اللي في شنطته كانت رمز لرضاه عن مصيره، وإختلافه عن الأخرين. مش عارف…… تقدروا تشوفوا المشهد على لينك يوتيوب دي

https://youtu.be/W7voy1vit6Y

Facebook Comments

24 Comments

  1. يا عم وعهد الله
    انت عامل زي احمد عفيفي كده في تحليلات الماتشات بس سينما 😂😂😂😂😂
    يخربيت عمقك يا جدع

  2. الريشة بتمثل الإنسان وصراعه مع الحياة وأنه ضعيف زيها ومهما حاول حتهزمه …. الكتاب هنا هو الطفل إللى جوا كل واحد فينا …. تحليلك رائع انا سعيد بالصفحة لأنى بتفرج على الأفلام بالمنظور ده وكنت فاكر نفسى مجنون

  3. تحليلك للمشاهد بيحببنى اكتر فى الافلام وسبحان الله بتحللوا نفس الافلام اللى بحبها والله انت مبدع يا ادمن وبجد شابوووووه
    اما توم هانكس ده اسطوره لوحدو

  4. ايه الحلاوة دى أقسم بالله … أنت رائع واختيارك للكلمات مذهل واختيارك للأفلام مبدع

  5. Life is like a box of chocolate , you never know what you gonna get
    Forrest Gump 💙
    تحليل حضرتك للفيلم و المشاهد دي بالذات اللي غالبا بعض الناس مبيدوهاش اهتمام جميل جدا 🍀
    البيدج دي مسلية 😄💜

  6. انا بقيت بحب تحليل حضرتك لمشاهد الافلام اكتر ما بحب المشاهد نفسها !

  7. الفيلم ده عبقرى و التحليل بتاعكم للمشاهد عبقررررررى 👌

  8. تحليل اكتر من رائع
    Respect

  9. مجربتش تعمل فيديوهات يوتيوب و تعمل مراجعات كامه للافلام برؤؤيتك انت ؟

  10. فيلم رائع وتحليلك رائع 👌👍

  11. بجد بحيكم على اختيارتكم لمشاهد جميله بتحليل متقن جدا

  12. ذ عبد الوهاب مطاوع قال فى مقاله الريشه بترمز للبطل نفسه حين تتقاذفه الحياة من مواقف مختلفه واحداث ليس له يد فيها كالريشه فى الهواء يحركها الهواء حيث يشاء

  13. زتونة الفيلم للي مش عايز يتفرج
    هو سؤال واحد
    احنا اللي بنصنع اقدارنا و لا اقدارنا اللي بتتحكم فينا
    و المشهد دا بيلخص السؤال دا و ممكن نربطه بمشهد النهاية اللي فيه نفس الريشة بتسيب الكتاب و تطير في الهواء
    و ابطال الفيلم منقسمين للطرحين
    فريق بيقول ان احنا اللي بنعمل اقدارنا و دول فورست و امه و بوبا و عائلة بوبا
    اما الفريق التاني اللي بيقول ان اقدارنا هي اللي بتسوقنا فهم دان و جيني
    و في الاخر بيدي لك الخلاصة ان الحياة حبة من دا على حبة من دا
    اظن ان دا ملخص ال moral اللي وراء الفيلم

  14. شبة مشهد الكيس اللي في فيلم American beauty اللي بردوا الهوا بيطيروا في شبيه لده كتير في الفكره وبرده في الخلفيه الموسيقي الخاصه بالفيلم بس المشهد ده احلي

  15. مشهد الريشه ف البدايه والنهايه بيمثل الجمله اللي قالها فورست ف كلامه ف الاخر وهو واقف عند قبر جيني
    “Jenny, I don’t know if Momma was right or if, if it’s Lieutenant Dan. I don’t know if we each have a destiny, or if we’re all just floating around accidental-like on a breeze, but I, I think maybe it’s both. Maybe both is happening at the same time.”

  16. عبد الوهاب مطاوع شرح الفكرة بتاعة الريشه ان كلنا ريشه في الهواء…. بتتلاعب بنا اقدارنا بالضبط زي الهوا ما بيتلاعب بالريشه….. و حكي قصة الفيلم تحت نفس العنوان ريشه في الهواء في كتابه الرائع عاشوا في خيالي 🙂

  17. تحليل مذهل كالعادة
    طب مايمكن الريشة بترمز ليد القدر اللى بتحركنا في كل اتجاه وفى لحظة واحدة بعد ما كنا قاب قوسين أو أدنى من الوصول لهدفنا نجد اننا بنبعد عنه كتير
    القدر اللي بيسيرنا واحنا متصورين اننا نمتلك الاختيار والتقرير.

  18. هى الريشه ممكن نقول انها بترمز للمصير الى احنا مش هنقدر نغير حاجه فيه او أن الإنسان مسير مش مخير فى معظم حياته فا عامل بالظبت زى الريشه الى طيره فى الهواء عمرها ما هتقدر تتحكم في مصيرها

  19. رأيي ان المشهد ده تلخيص للفيلم و ان الريشة بتبين الرحلة للبطل الضعيف اللي الحياة عمالة بتوديه في كل حتة شوية و قبل مايستقر في الحتة الغلط كانت الحياة بتبعته لحتة تانية لحد ما وصلت للكوتشي اللي خلى البطل يكتشف ذاته و بقى حد الناس كلها عارفاه و برضه الريشة استقرت عليه و فورست خدها و حطها في وسط الكتاب و لاحظ الصورة اللي فورست حطها فيها في وسط السحاب زي اول لقطة للريشة خالص

  20. بصراحه مليت من الفيلم ومكملتوش
    مش عارف ليه
    مع انه ممثل عبقري والفيلم مكسر الدنيا
    بس بصراحه مكنش رأيي انا لوحدي
    انا و2 كمان
    والغريبة احنا ال 3
    من اساتذة الافلام الاجنبي
    وانا وصحبي شغاليين بنحمل افلام بدون اعلانات وهنعمل موقع قريب
    يعني عايز اقول ان احنا اهل المتابعة معجبناش الفيلم ابدا
    انا مش عارف ازاي مليت ومكملتش الفيلم
    طب هل بيبقى حلو ؟
    انا مشفتش اخر 40 دقيقه وقفلته

  21. أنا بيتهيألي ان الريشة دي بترمز للحظ اللي كان ملازمه طول الفيلم… كان دايما بيتصرف على طبيعته و بيعمل اللي عليه، و تقريبا ده سبب ان حظه كان دايما معاه!

  22. انا حبيت الفيلم دا من كتاب عاشو فى خيالى لعبدالوهاب مطاوع بصراحه فيلم ممتع و توم هانكس ملوش حل

  23. الفيلم ده واحد من أفلامي المفضلة موسيقى فظيعة و توم هانكس إجتهد فيه جدا و بذل مجهود كبير واضح جدا ف التمثيل ❤❤

  24. احسن فيلم فى التاريخ الانه بيتكلم على فكرة القدر كل حاجه فى الفيلم ليها معنى

‎إضافة تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

You may also like

قصة ونهايه فيلم Whiplash 2015

Whiplash | 2015 مشهد النهاية من فيلم ويبلاش