قصه فيلم ونقد ساعة ونص

قصه فيلم ونقد ساعة ونص

- ‎فيفن وسينما
7٬269 views

ساعة ونص | 2012

“طب أنا خلاص يا ابني.. أنا رجلي والقبر إنما انتو.. هاتعملوا إيه في سنينكو السودا وأيامكو المهببة دي.. يا حبيبي.. لو عايز تخدمني يا حبيبي.. رجعني مصر”.

ده مشهد للراحلة كريمة مختار مع إياد نصار، واللي قامت فيه بدور أم مسنّة ابنها ركبّها القطر وساب معاها ورقة مكتوب فيها لأي حد يلاقيها إنه يسلّمها لأقرب دار مسنين. أحداث الفيلم مبنية على حريق قطر العياط من خلال سرد مجموعة من الحكايات الإنسانية لركّاب القطر من كل طوايف المجتمع المصري خلال ساعة ونص من الزمن.

أداء جيد لإياد نصّار، واللي واضح مدى تأثره بالمشهد. أداء كريمة مختار كان تلقائي جداً وأكتر من رائع، وبالذات في جزء من الحوار لمّا بدأت تلوم نفسها إن هي السبب في اللي حصل، وإن إبنها مايقدرش يعمل حاجة من غيرها.

كما هي العادة، الموسيقى التصويرية لياسر عبد الرحمن أضافت بعد رائع للمشهد، وكأن الموسيقى بتاعته أصبحت معجونة بآلام وأحزان وإحباطات المصريين. الله يرحم كريمة مختار، واللي كانت بالفعل “ماما كريمة” لملايين من المصريين. تقدروا تشوفوا المشهد على لينك يوتيوب دي

https://youtu.be/vDnXEFnaes8

Facebook Comments

25 Comments

  1. الموسيقار ياسر عبدالرحمن – يعني اليل واخرة و المال والبنون و ايام السادات …💛

  2. الفيلم دا السبكي عمله ونزل معاه ف دور العرض عبده موته وكان عامل الفيلم ده للنقاد اللي بيقولو عليه منتج الافراح الشعبيه وبينلهم انه يقدر يعمل افلام عميقه بس مش هتجيبله فلوس

  3. بجد المشهد ده من المشاهد اللي تخلي الواحد ميقدرش يكمل الفيلم من قساوته و قساوة الواقع اللي طرحه المؤلف و فريق العمل كله 😫 … فيلم يخليك تستعجب من ازاي الناس ديه بتعدي يومها و هي منتظره بألم و حسره و عجز اليوم اللي بعده علشان تكمل نفس المعاناه و الحياه الضايعه اللي هما عايشينها و شايفينها حوالليهم … و قصص كتييير اتحكيت في الفيلم بكل تفاصيلها من البطاله و العقوق و الغربه و العجز و المرض و غيره و غيره …
    فيلم من اعظم الافلام اللي شوفتها والله .. شابوه لفريق العمل و الممثلين 👍👌
    و كالعاده تحليل رائع بجد منك و احييك على اختيارك للأفلام اللي بتحللها و بتظهرلنا ادق تفاصيلها لينا اللي ممكن ما نكونش خدنا بالنا منها كويس .. شكراً بجد

  4. الفيلم ده للأسف معتقدش انه اخد حقه او حتا التكريم الي يستاهله..
    كله حالة كئيبة فعلا

  5. رغم انه حضرتك في الواقع فيه اصعب من كده بكتير ..بس الفيلم فيه الحبكة الدراميه.يعني تلاقي فى الواقع ست مصريه أصيلة زوجها متوفي وعندها السرطان وبتعافر في الحياه عشان تعلم وتربي اولادها الصغيرين فى مجتمع قاسي ميعرفش غير الواسطه والسلطه وغيرها وغيرها كتير. ربنا يصلح حال البلد

  6. انا شفت المشهد ده مرة واحدة بس و لم أجرؤ على مشاهدته مرة تانية و لحد اللحظة دي كل ما بفتكره عينيا بتدمع

  7. ياسر عبد الرحمن و راجح داوود عباقرة الموسيقى التصويريه. ساعة و نص تراجيديا ابكت قلبى اما عن أداء كريمة مختار الاحترافى ..لا تعليق

  8. اجمل تعبير قولتوه فوق ..(( ..موسيقى ياسر عبد الرحمن عملت بعد رابع للمشهد ))…شابوووه

  9. من اصعب واحزن المشاهد اللي مش بحب اتفرج عليها
    وانها بتدور علي ابنها
    عندي عاطفه تجاه كبار السن

  10. انتم صفحة ممتازة ومميزة فعلااا،، بتخلوني اشوف الأفلام بشكل تاني وكأني أول مرة أشوفها ، وأعيش جواها كأني جزء منها ، ربنا يوفقكم

  11. ومين يقدر يستحمل كلام كريمه مختار حتي لو تمثيل اتقانها للدور هيخلي اياد و كل متابعين هيتاثروا
    ربنا يرحمها

  12. نظره اياد نصار ليها وهو ف عز المشاكل فيها معاني كتير اوي….ربنا يرحمها

  13. ع فكرة المشهد مستوحي من قصة حقيقية
    كنت سمعتها ايام الشرايط الكاسيت قبل الفيلم بسنين ع لسان احد الشيوخ وهو بيحكي عن عقوق الوالدين

  14. واحد من افضل الافلام العربية فى تاريخ السينما العربية للاسف الفيلم لم يأخذ حقه من الاحتفال والاهتمام كعادتنا

  15. الفيلم ده هو وفيلم ‘بنتين من مصر’ أقسى و أصعب شيء اتعرض على شاشة.. والمفروض كان فيه مشروع لفيلم مشابه بيوثق شهادات الناجين من السلام 95 في شكل درامي .
    المشكلة أنك متقدرش تتفرج عالفيلم و تقف. لازم تكمله .

  16. من افضل الافلام المصرية في السنين الاخيرة ، ومشهد الطفل الصغير لما احمد السعدني بيموت برضو من افضل مشاهد الفيلم

  17. انا بكره الفيلم ده كره في كمية بؤس تكفي العالم حزنا لمده ميه سنه قدام

  18. انا عيطت كتير لما شرفت المشهد ده بيوصف حاجات كتير خصوصا لما تكون مغترب وبعيد عن اهلك وحبايبك وأصحابك وكنت اول مره اشوفه وانا مسافر

  19. أقسم بالله عمري مادمعت على مشهد ف حياتي غير المشهد ده ومشهد موت ماما نونة 😢
    الله يرحمك كريمة مختار 😢😢

  20. الفيلم دا فوق الممتاز لوصفه الواقع
    وبكيت فيه بكاء ودا اكتر مشهد😰

  21. ياسر عبد الرحمن،،،، لا تعليق اقوى موسيقار في مصر

  22. ربنا يرحمها… بس ياسر عبدالرحمن مبدع بموسيقته

  23. المشهد دة فاق قدرات التمثيل مشهد معقد اداء عبقري و تحليل كالعادة منكم عبقري

  24. ابوه كده والنبي كده ادخل عالمصري شويه

‎إضافة تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

You may also like

روجينا فى حلقه ابله فهيتا

استضافت ابله فاهيتا بالامس  روجينا  فى  حلقات برنامجها