The Matrix Reloaded | 2003 قصه فيلم

The Matrix Reloaded | 2003 قصه فيلم

- ‎فيفن وسينما
2٬633 views

The Matrix Reloaded | 2003

مشهد مطاردة “ترينتي” على الموتوسيكل دوكاتي، واللي يعتبر جزء واحد بس من مشهد أسطوري طويل اتعمل من 14 سنة، واستمر حوالي 15 دقيقة على الشاشة.

الطريق اللي هتشوفوه في المشهد طوله ميل ونص، واتبنى مخصوص عشان الفيلم ده، واللي بالمناسبة يعتبر أضخم موقع تصوير في تاريخ الانتاج السينمائي. صنّاع الفيلم أخدوا بالهم من آلاف التفاصيل زي العلامات الإرشادية، وكمان صمموا أجزاء من جوانب الطريق من الخشب بطريقة تقدر تخلّيهم يغيرّوا اتجاهات المخارج أو الكباري على حسب تتابع الأحداث. بالإضافة للطريق نفسه، المشهد ده ظهرت فيه 100 عربية من جنرال موتورز، واللي بعضها كان مزوّد بأقفاص داخلية عشان حماية الدوبليرات اللي شاركوا في اللقطات الخطيرة. بالإضافة للعربيات دي، صنّاع الفيلم استخدموا كمان مجاميع من الناس عشان يسوقوا 200 عربية تانية على الطريق من خلال نمط ثابت خلال المطاردة، عشان لقطات المناورة تظهر واقعية إلى أقصى الحدود.

اللقطة اللي “ترينتي” نطت فيها بالموتوسيكل من فوق العربية في الدقيقة 1.48 اتعملت بتقنية متطورة بإن الموتوسيكل نفسه كان مربوط بحبال على ونش عشان ينزل بالشكل ده على الأرض، وطبعاً كل الحبال اللي كانت مربوطة في الموتوسيكل اتحذفت من الشاشة عن طريق الكمبيوتر بعد تسريع اللقطة. الطريف إن النجمة “كاري-آن موس”، واللي عملت دور “ترينتي” في الفيلم، هي اللي ساقت الدوكاتي بنفسها في معظم اللقطات الخطيرة على الطريق. عشان تصوّر اللقطات من غير دوبلير، كاري-آن أخدت تدريبات لمدة 3 شهور على إيد محترفين، وبدأت تتمرن على موتوسيكلات أقل قوة في البداية لغاية ما وصلت لمستوى احترافي إنها تقدر تسوق موتوسيكل بالقوة المرعبة دي.

من أول الدقيقة 2.43، هتلاحظوا إبداع غير طبيعي في طريقة وزوايا التصوير لمّا “ترينتي” كانت سايقة عكس اتجاه الطريق. عدد من العربيات كان موجود بشكل واقعي على الطريق، لكن فيه لقطات تانية اتضافت فيها صور لعربيات عن طريق الكمبيوتر، زي اللقطة العجيبة في الدقيقة 3.08 لمّا الكاميرا نزلت فيها تحت عربيتين نقل عشان تصوّر المطاردة من زاوية مستحيلة. طبعاً المؤثرات الصوتية المتزامنة بشكل رائع مع الحركة، وكمان الموسيقى التصويرية، لعبوا دور كبير إنهم يضيفوا بعد مختلف للمشهد.

المشهد ككل اتجهز له لمدة سنة كاملة، وتصويره أخد سبع أسابيع متتالية عشان ياخد مكانه كواحد من أفضل مشاهد المطاردات في الوقت ده. بالمناسبة، جنرال موتورز ودوكاتي دفعوا عشرات الآلاف من الدولارات عشان منتجاتهم تظهر في الفيلم، وبالفعل مبيعاتهم زادت بشكل خيالي بعد عرضه في كل أنحاء العالم. معظم المعلومات في البوست ده مترجمة من برنامج اسمه Fifth Gear. تقدروا تشوفوا المشهد على لينك يوتيوب دي

https://youtu.be/eF9AC2Ce2ow

Facebook Comments

24 Comments

  1. طب بعد التحليل الرائع ده محطتوش المشهد ليه عشان الناس تفتكره

  2. بصراااحه هيا السلسه كلها من اروع السلاسل اللى سمعتها فى حياتى😍
    The Matrix

  3. الأكشن في العالم ما قبل ماتريكس غير الأكشن ما بعد ماتريكس
    الأخوين أندي ولاري وتشاوسكي غيروا تكنيك تصوير وتاريخ الأكشن في العالم

  4. هو الفيلم يعتبر اسطورة ومن اجمل سﻻسل الافﻻم على الاطﻻق والحرفية فى صنعه تخليه متفرد فى كل شىء

  5. كفاية ان فيلم بقاله اكتر من 10 سنين و لسا الناس بتتكلم عنه و عن التقنيات الي فيه مع انه من اكتر من 10 سنين !!
    Matrix forever 😀

  6. المشهد دة لوحده خلى ماتريكس أعظم فيلم اكشن اتعمل و كل المطاردات اللي اتعملت بعده بتقلده بلا استثناء

  7. تحليلكم رهييب
    بالرغم انى عارف المشهد لس بتفرج عليه عشان اشوف ايه الى كان ناقصنى وانا بتفرج عليه
    استمرواا ❤😍

  8. على فكرة تكلفة المشهد دا كانت 40 مليون دولار فى هذا الوقت ودا مرة سمعتة فى أحد البرامج وكان أعلى تكلفة على الإطلاق فى تاريخ السينما الأمريكية .

  9. في غلطه ! هي لما النقل قفل عليها الطريق مسكت فرامل امامي الي هي العجله الاماميه الي المفروض كانت تخليها تتقلب علي وشها بالسرعه الي كانت ماشيه عليها دي 😁

  10. سلسلة the matrix 😍
    تسلموا فعلا ع تحليلكم الرائع
    ده 👌👏

  11. انا اكتر حاجة جذبتني ف الموضوع ان الفيلم من 14 سنة للدرجة دي الايام بتجري 😨

  12. يابخت البطل نفسو لانو كان بيبوس مرات الراجل الفرنسي صاحب المطعم الفرنسي ههههههههه

  13. بس مشهد السيف الي نزل عليه من فوق شاحنه النقل اتغير مكان السيف هو ضربوا أعلي ونزل اسفل

  14. تحليلكم بيخليني اشوف المشهد تاني لكن بطريقة مختلفة تماما 😊

  15. سيبك انتا التحليل ولا اروع ماشاء الله عليكو لو انتا معاك امكانيات اكيد هتعمل احسن منهم

  16. دلوقتي المشهد دة يتعمل في اسبوع في الاستوديو بفضل الجرافيكس

  17. ماتريكس من احلى افلام الاكشن بجد.

  18. ماتريكس كان فيلم أسطوري

  19. بعشق كل سلسلة افلام
    The matrix ❤❤❤❤❤❤❤❤

  20. يسلم تحليلكم للمشاهد اللى بتختاروها

  21. صفحه مبدعه في تحليلاتها

  22. يخربيتك دا التحليل ممتع عن المشهد

‎إضافة تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

You may also like

قصة ونهايه فيلم Whiplash 2015

Whiplash | 2015 مشهد النهاية من فيلم ويبلاش