Dunkirk | 201 قصه وتحليل فيلم

Dunkirk | 201 قصه وتحليل فيلم

- ‎فيفن وسينما
2٬449 views

Dunkirk | 2017

في الحقيقة “دنكيرك” فيلم مختلف تماماً عن كل أفلام الحروب اللي ظهرت في العشرين سنة الأخيرة. الفيلم مش بس مبهر على المستوى البصري، لكنه كمان في قدر غير عادي من الإبهار في الساوندتراك وهندسة الصوت.

المخرج “كريستوفر نولان” وعبقري الموسيقى التصويرية “هانز زيمر” استخدموا تقنية عجيبة في الساوندتراك اسمها “شيبرد تون”. باختصار، التقنية دي عبارة عن تلات مجموعات من الأصوات بتتلعب مع بعض زمنياً لكنها مختلفة في تدرّج الحدة. التون الأول بتزيد حدته بشكل تدريجي، التون التاني بينزل لتحت وبتقل حدته تدريجياً، والتون التالت ثابت وصوته عالي جداًً. النتيجة إن التكنيك ده بيخلق “وهم صوتي” عند المشاهد لأن العقل البشري هيستقبل مجموعة الأصوات دي كلها، وكأنها بتعلى إلى ما لانهاية أو بتختفي إلى ما لانهاية، واللي هيعمل حالة من التوتر طول أحداث الفيلم.

الحقيقة إن صنّاع الفيلم أخدوا التقنية دي لمستوى أعلى، واستخدموها كمان في صوت الطيارة ال “سبيتفاير”، وده اللي خلّي كل مشاهد الطيران تظهر وتتسمع أصواتها بشكل مختلف تماماً. الناس اللي إتفرجت على الفيلم ممكن يلاحظوا في الخلفية صوت دقّات الساعة اللي ظهر من أول الفيلم، وماوقفش إلا لمّا الجنود وصلوا لبلدهم. العجيب إنك هتاخد بالك من الصوت ده في أول خمس دقايق من الفيلم، وبعد كده ودانك مش هتسمعه أو تفصله بشكل منفرد إلا لو ركّزت إنه موجود، لكنه بيزوّد إحساسك بالتوتر وإنت بتتفرج. بالمناسبة، الصوت ده هو صوت ساعة “نولان”، والي “زيمر” أخدها منه عشان يضيف صوت دقّاتها لساوندتراك الفيلم.

ناس كتير إنتقدت الفيلم لأنه مسابش مساحة للمشاهد إنه يعرف أكتر عن شخصيّات الفيلم أو خلفياتها عشان يتعلق بيها. أعتقد إن “نولان” تعمّد إنه يعمل كده عشان تجربة المشاهدة تكون مركّزة على درامية حصار وإجلاء “دنكيرك” من غير أي تفاصيل إضافية، واللي بالمناسبة ماظهرش فيها ولا نقطة دم واحدة. مش عارف الفيلم ده ممكن يترشّح أو ياخد كام جايزة أوسكار لكن من المؤكد إن أوسكار أفضل Sound Design هتكون من نصيبه.

مصدر الكلام عن تقنية الصوت هو The Vox، وموجود اللينك بتاعه في أول كومنت على البوست. لو عايزين تعرفوا التكنيك ده بشكل عملي، حطّوا الهيدفونز واسمعوا موسيقى الفيلم على لينك يوتيوب دي

https://youtu.be/KKkCP7ovMQA

Facebook Comments

20 Comments

  1. الطياره اسمها speedfire مش سبيتفاير 😃

  2. محمد عبد الرؤف موسى

    وجهة نظر شخصية ………. فيلم سئ وليس به اى عامل اثارة ولا به ابداع من اى نوع ومحاولة لاظهار بطولات لا وجود لها وفيلم لا هدف له سوى انه فيلم واانا عمرى مشوفت فيلم يبقه الابداع الى فيه الصوت لو على الصوت انا ممكن اعملك اوبرا عايدة للصبح ( 😀😀😀😀😀) والفيلم لما حاول يظهر بطولة اظهر بطولة بسبب شخص الممثل وهى طبعا بطولة الطيار الى ضحى بنفسه للاسر مع انه كان ممكن يهرب وخاصة انه هبط بالطيارة فى وضح النهار وولع فى الطيارة واستنه جنبها لغاية بالليل لما الالمان وصلوا علشان يقع فى الاسر علشان طبعا الممثل تيم هارى تقريبا ده اسمه يعنى بطولة علشان ممثل فيلم فى مجمله 1/10 ………. وجهة نظر

  3. Mohamed Osama Nosair

    اعتقد نولان هيترشح كأحسن مخرج و كأحسن سيناريو — السيناريو كان قوى رغم قلة الجمل الحوارية — و كمان هيترشح كمنتج فى جايزة أحسن فيلم.
    هانز زيمر طبعاً هيترشح لأحسن ساوندتراك.
    الفيلم هيكسب best sound editing و best sound mixing بكل تأكيد و هينافس على الجوايز التقنية بشكل كبير جداً و ممكن يكتسحها.
    فوز نولان بالأوسكار بقى وشيك جداً.

  4. سيظل saving private ryan افضل فيلم حربي اتعمل في تاريخ السينما
    من ٢٠ سنه ولسه محتفظ بكامل جودته

  5. هانز زيمار لو عزف عشوائى علي البيانو حيطلع حلو
    يعني ايه هانز
    يعني
    Gladiator
    Last samurai
    Pearl harber
    Davenci code
    The rock
    Pirates of the carrebian

  6. Mahmoud Samy El-Shrief

    المفروض احنا داخلين السينما نشوف فيلم مش نسمع ساوند تراك او نشوف تصوير خرافي ومش هيظهر الا بال imax… ايه الفايده انك متوصليش الشخصيات وتعرفني عليها علشان اعرف اتعاطف معاها او اتأثر بالمحنه اللي كانو فيها ايه الفايده اني اقعد اتفرج علي طيارات بتضرب ف بعضها وكل اللي بيحصل انهم عاملين يراقبو عدادات الوقود… ايه الفايده اني اتفرج علي نص ساعه اخيره مفيهاش اي تأثير وكل اللي شفته طيارتين بيضربو ف بعض والناس علي الشط بتهلل لقدوم المراكب المدنيه… احسن مشهد ف الفيلم هوه اول مشهد واخر مشهد والجندي بيقرأ الجرنال غير كده بلح… لو تقارن الفيلم ده بانترستيلر انا حسيت فيه بمعاناه البطل ومعاناه الناس اللي علي الارض علشان نولان عيشني مع الشخصيات فتره قبل اما يفصلهم عن بعض وكمان الساوند تراك كان بيخدم علي كل ده… فيلم دنكرك للاسف غير متكامل كفيلم يخليني استني اشوفه كل فتره

  7. الحرب تُعاش ولا تُحكى .. ده كان مبدأ نولان إنه يحطك جوه القصه من غير ما يحكيلك حاجه ويسيبك تعيش إحساس الحصار في دنكيرك بأقل جمل حواريه ممكنه

  8. أحمد أحمد علوان

    ياجدعان انتو مديينو اكتر من حجمه والله وفيلم عادي جداا وممل

  9. انا طول الفيلم نفسي كان محبوس ، في IMAX الرصاصة صوتها بيجي من نفس اتجاها في الفيلم ، عجبني بشدة

  10. الفيلم فعلا حلو جدا جدا والساوند فيه كان احلى حاجة مشاهد الطيار وهو بيغرق الصوت فيها حرفيا ضيعلى نفسي حسيت اني بغرء معاه 😂
    فيلم محترم جدا 👍

  11. الفيلم قصير نسبيا 1:39 و رغم ان كان في تفاصيل كتير جدا ممكن كانت تتشرح…. الفيلم مابينش ايه اللي خلي المراكب السياحيه والصيادين يتجمعوا و يتحركوا لانقاذ الجيش… الفيلم مابينش اي رد فعل من جانب الجيش الالماني….مشهد مطاردات الطيارات كان ممكن يكون احسن من كده وفيه اثارة اكتر….قصه مركب سياحي واحد بس اللي اهتم بيها الفيلم رغم ان كان فيه مراكب تانيه كتير…. اللي مايعرفش و مقراش قبل كده عن الموقعه دي مش هيفهم ايه اللي بيحصل… اعتقد ان نولان اعتمد ع معرفه المشاهد المسبقه للاحداث…. الحقيقة ده مش مستوي كريستوفر نولان نهائي… كنت اتوقع منه شئ افضل…. ف رأي الفيلم لو كان اسند ل Stephen Spielberg كان هيكون أقوى بكتير

  12. عبدالله غزالي

    فيلم عادي جدا والله بلاش أڤورة

  13. من الاخر نفس الفيلم بالضبط لو عليه اسم مخرج تاني كان فشل

  14. لا هما عاملين الموسيقى علشان اللى هينام فى الفيلم هى تصحيه

  15. Hanz + Nolan + Hardy = An Oscar Worthy Movie 😍😍

  16. Āmîŕ Møháměđ

    يستحق الاوسكار 😍

  17. Respect for mentioning the source, Vox <3

  18. فيلم بايخ جدا وممل

  19. المخرج اتفلسف زيادة عن اللزوم.

‎إضافة تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

You may also like

قصة ونهايه فيلم Whiplash 2015

Whiplash | 2015 مشهد النهاية من فيلم ويبلاش